紐記有Heart 我撐佢!

猪拉多纳

黑貓換完帥都係咁衰

今晚英超有場東北打吡，由新特蘭喺主場迎戰紐卡素，「黑貓」今季成績非常不濟，開季至今仲未贏過波，最慘係換帥之後依然未見起色，就算有地利都一樣信唔過。依家足智彩開平手盤，小妹撐硬紐卡素。

「黑貓」新特蘭今季表現唔掂，成績遠低於預期，踢完8輪竟然係英超20隊中唯一未開齋球隊，家陣8戰得1和7負只得1分，再唔生性真係下季英冠再見。雖則話球隊管理層之前已經將主帥迪肯尼奧炒魷，不過換嚟新帥普耶都唔見好得幾多，上場對史雲斯係佢首度領軍，即刻吞4蛋而回，就知佢冇料到啦！老實講，班波踢到依家都踢唔出隊型，士氣同鬥心都差，尋日意大利嗰邊仲有消息話，國米準備喺冬季轉會窗重開嗰陣收購基亞卓尼利，強化個「3-5-2」陣式，「黑貓」將會又少一個踢得之人，仲點信得過吖。
攻擊點多作客一樣交到貨

反觀紐卡素班波就畀人睇到好有Heart，上場聯賽佢哋同利物浦激戰，戰情峰迴路轉，「喜鵲」雖則有法國中堅恩加麥比華領紅牌被逐，但一樣能夠兩度領先對手，即使最終被逼和2:2，小妹都對佢哋演出拍爛手掌，就連紅軍領隊羅渣士賽後都讚紐卡素踢得好。

再者，「喜鵲」前鋒雷米今季狀態唔錯，開季至今已有5個「士哥」，卡比耶同賓艾化每人都已有2球進帳，得分點多係佢哋優勢。再睇埋紐卡素近4場作客比賽，每場都有2個入波，相信今晚出訪光明球場都冇有怕，小妹對紐卡素砌低「黑貓」可以話有百分百信心，平手盤捧客隊實冇衰！