國米搶Ｗ討老闆歡心

猪拉多纳

意甲周中開快車，國際米蘭今晚率先登場作客阿特蘭大。國米新老闆托希爾準備大展拳腳，隨時增兵同埋放棄表現欠佳球員。因此教練馬沙利或球員都要爭取表現博上位甚至加薪，特別唔會放過今場對手「偽國米」阿特蘭大，客Ｗ有1.87倍值博。

（周三凌晨3時45分開賽）

印尼商人托希爾係體育大亨，屬於NBA球隊76人及美職華盛頓聯隊嘅主要股東，佢日前仲去欣賞一場街頭籃球賽，同前76人名將艾佛遜合照，送咗件國米波衫畀對方。托希爾係識波之人，球員表現瞞唔過佢雙眼。國米上下依家打醒十二分精神，上仗贏波結束不勝頹勢，預料會繼續發威，討新老闆歡心。

值得一提，兩隊主場球衣同樣係藍黑直間，國米上季被阿特蘭大「雙殺」後，傳媒同球迷揶揄阿軍先至係「真正國米」，令呢支老牌豪門顏面無存，今仗點都要贏波攞番個「金漆招牌」。
里爾煲慣魚生粥吼細

法聯盃方面，阿些斯奧近年都係法甲護級分子，冇能力兼顧盃賽，遇上狀態回勇嘅巴斯蒂亞，睇怕冇運行。另一場里爾主場要贏乙組仔歐塞爾，應該冇問題，但里爾慣「煲魚生粥」小勝收場，主W賠率太低，可揀入球細。