車仔雪櫃兵秤「仙」

猪拉多纳

英聯盃16強爆倫敦大戰！

英聯盃16強今晚有英超「一哥」阿仙奴主場火併車路士，牌面睇呢場倫敦打吡分量十足，不過「兵工廠」領隊雲格近季踢親聯賽盃都鍾意用小將，今鋪撞着車仔星級雪櫃兵，睇怕都幾難有運行，家陣平手盤捧1.9倍嘅車路士冇衰！

（TVB01及now801台周三凌晨3:45直播）

「兵工廠」今季表現令人喜出望外，踢完9輪聯賽以22分排榜首，踢歐聯喺死亡之組一樣攞到3戰2勝對得住Fans。講到咁巴閉，但點解力奇轉個頭就叫讀者捧對家？首先今晚倫敦嗰邊可能會有大風暴，或者會影響阿仙奴嘅小組短傳踢法，其次係雲格一向視聯賽盃係考驗新人同後備球員嘅好機會，即使以往踢到去決賽，都照派副選落場，頂盡係搵番三幾個主力領軍，平時對住英超二、三流球隊或低組別隊伍當然有得砌，只係今鋪對住星級車仔，想贏波睇落好難。
阿仙奴副選冇個掂

咪以為力奇齋吹，上周末佢哋贏水晶宮一仗，有中場重心阿迪達被逐，本來雲格話有晒理據可以提出上訴，但最後考慮到只係停賽一場，決定唔好搞事費事惹麻煩，反正佢都冇諗住要阿迪達再搏多場咁話。睇番佢哋上圈對西布朗，真係一線兵咪只得華美倫、梅迪薩卡同贊堅臣等，中場大家噏得出個名仲有日本仔宮市亮，前線咪用緊早排肥到隻豬咁嘅賓特拿囉，如果今晚又係用呢個咁曳嘅雪櫃陣容，你捧埋我份囉！

車仔呢邊，前晚先鬥完曼城，領隊莫連奴玩輪換都好合理，即係話一眾星級雪櫃兵諸如丹巴巴亞、桑馬達同伊度奧都會打番正選，都要博表現爭取莫帥歡心，你使驚佢哋揸流攤？再者，睇番佢哋過去4屆英聯盃，有3屆至少殺入8強，從未試過放軟手腳o架，即使今仗係作客出擊，贏卡士依然要捧！
乜都玩錦囊 對賽旺入球大值得追

信數據今場玩入球大應該冇衰，除咗話車仔近5場都開大，成班波腳風超順之外，原來車仔近5次造訪酋長球場，有成4次同阿仙奴合演入球騷，每次碰頭都踢到飛沙劈石，除咗車仔個平手盤，1.65倍大亦值得兼顧o架！
Data King 車仔近3次鬥廠仔未輸過

車仔近2年3鬥阿仙奴得2勝1和。

藍戰士曾4奪英聯盃冠軍，封王次數僅不及利物浦同阿士東維拉（5次）。

車路士近5戰均開入球大，有4場開半場勝。

猪拉多纳