曼城換走「糟‧赫特」

猪拉多纳

歎喜鵲私房菜定驚

曼城門將赫特貴為英格蘭國門，日前喺英超再犯下低級錯誤，唔少擁躉都被「糟‧赫特」呢球嚇凸之餘，更令捧場客輸到眼凸。「藍月亮」今晚轉戰英聯盃16強，換咗彭迪利蒙把關，唔使擔心再有嚇人演出，對手更係紐卡素呢道私房菜，曼城作客讓一球梗要吼實2.65倍「讓客」。

（TVB13及now818台周四凌晨3:45直播）
彭迪利蒙把關 迪斯高攻堅

「糟‧赫特」繼歐聯鬥拜仁兩輸近柱波及對莫斯科中央陸軍輕出累事後，日前英超「雙藍會」面對車路士，失驚無神衝出嚟又唔提場，搞到隊友拿斯達錫頭槌回傳變助攻，最終被費蘭度托利斯絕殺冇仇報。曼城主帥比歷連尼賽後嬲爆咁話：「我哋咁樣失分蠢到爆，我唔知道呢種輸波方式係咪最弊，但肯定係最弊之一。」雖然比帥終歸冇開名指摘邊一個球員，不過邊個要孭鑊心照啦！

曼城今輪英聯盃雖作客出戰，但改由彭迪利蒙把守最後一關，穩陣程度肯定高過赫特呢個計時炸彈，後衞又唔使驚身後無端端有人殺埋嚟，清波解圍都零舍有信心。至於箭頭迪斯高喺日前聯賽冇落場，養精蓄銳喺今場擔正搏殺之外，近4場入6球狀態勇猛嘅阿古路，同埋後備殺手尼格度亦隨時候命，開行猛火強攻對手，唔使怕冇波入。
紐卡素一對中堅打柴

相對曼城喺英超輸蝦碌波唔抵，紐卡素喺「東北部打吡」明刀明槍硬撼宿敵新特蘭，最後畀「黑貓」砌低取得聯賽首捷，呢場對「喜鵲」球員嚟講打擊唔細。再者佢哋近兩輪聯賽主場鬥侯城同利物浦夾埋失咗5球，由於中堅拍檔高洛仙尼及史提芬泰萊繼續養傷，防線明顯信唔過，今場面對近8次交鋒贏晒佢哋嘅曼城，想好似對上兩圈英聯盃鬥摩甘比同列斯聯咁清脆贏波？好難囉！
Data King 雙方對賽旺開大

‧雙方近8次對碰，曼城錄得全勝。

‧以2.5球中位數計，雙方近10次對壘開出8大2細。

‧雙方近10場對決，曼城半場從未落後，取得7勝3和佳績。
乜都玩錦囊 藍月亮往績靚吼半場W

翻查對賽往績，雙方近10次碰頭之中，「藍月亮」曼城總共開出8場「入球大」及7次「半場W」，既然兩瓣都咁好路，當然揀選較高分頭嗰瓣，2.17倍「半場W」咪走寶！