冷W熱W各有路捉

猪拉多纳

　　練馬師的部署取向各有不同，有些喜歡旗下馬出其不意爆冷；有些則以穩陣為先，即使賽駒變熱亦無所謂。

　　喜歡部署博冷的練馬師通常有三招：一是強馬配冷人；二是轉跑盲門路程；三是升班搏。這三招足令馬迷度馬時，出現「係唔係真？」的懸念。當然，最終能否贏出，就要看練馬師有冇睇錯馬及該駒實力了。

　　齊喝采轉跑盲門路程

　　舉個例，前晚夜賽第四場泥地1800米，頭馬「齊喝采」前仗跑泥地1650米在慢步速追入季軍，唔係太失禮，但上仗增程至1800米卻有14倍W，點解？歸根究底，是牠之前不管草地泥地，一跑1800米及以上路程就麻麻，最叻得第三，所以呂健威安排牠轉跑盲門路程，大家就不信。結果威哥博冷成功，「齊喝采」拉士一樣爆得起，贏出14倍冷W。除了「齊喝采」，文頭馬「鑽飾天使」有8.4倍、方頭馬「馬得利」有8.9倍，全部出於此理。

　　反觀穩陣練馬師會用至Top騎師搏馬，務求無意外，如前晚第二場徐「神舟十號」以輕鬆姿態取勝時，在下就諗：如果此駒不配潘頓，配湯智傑，賽果會否一樣？好難講，但賠率一定不是2.4倍。