柏雷素爾+1採紅鑽

猪拉多纳

今日東京國立競技場上演日本聯賽盃決賽，浦和紅鑽決戰柏雷素爾，蘇豪今夏到訪兩間球會，兩軍教頭風格好唔同，紅鑽主帥柏度域自由奔放，帶到班波紀律麻麻，打決賽係大忌！柏軍教頭尼仙奴好認真，而且擅於部署，今戰仲有王牌球星李安度杜明基斯復出，受讓博「讓球客勝」！

（周六中午12時05分開賽）

蘇豪今夏日本之行深入紅鑽大本營，見到柏度域梗係捉住佢吹水啦，印象最深刻係佢收操後一邊食煙一邊受訪，真係勁free囉！柏帥仲話唔介意球員去玩，最緊要準時練波，落到場交到貨就得。紅鑽於聯賽僅落後榜首橫濱水手兩分，某程度上反映呢種放任政策行得通，但佢哋後防始終唔穩陣，就算齊腳出戰仍存隱憂。
柏軍罰球王復出振軍心

柏雷素爾教頭尼仙奴超認真，之前佢賽季展望都長篇大論，好鬼專業。柏軍今季早將重心放喺盃賽，亞冠盃四強不敵超班球隊FC廣州係非戰之罪，上周聯賽對紅鑽無關痛癢，輸贏亦好閒。今戰大軍有左閘橋本和及中場大谷秀和坐波監，但有罰球王李安度杜明基斯復出，配合尼仙奴特製3-4-2-1陣式，有權砌低對手捧盃！