廠仔紅軍開Show 今晚鬥入波

猪拉多纳

着火三叉戟決戰SS雙箭

今晚英超壓軸戲上演榜前列大戰，阿仙奴坐鎮酋長球場恭候利物浦。久違聯賽冠軍滋味嘅兵工廠，今季個頭難得開到咁靚，奧斯爾、基奧特同艾朗藍斯嘅三叉戟個個撻着晒，縱然有歐聯後顧之憂亦必搏盡捍衞領頭羊位置。至於矢志贏波過一哥癮嘅利物浦，蘇亞雷斯與史杜列治嘅「SS」前線組合所向披靡，既然雙方進攻好手如箭在弦，一於吼實1.62倍「大」等睇入球騷！

（now621台周日凌晨1:30直播）
阿仙奴後防勁失波

阿仙奴翼鋒普多斯基養傷接近兩個月，日前雖全面復操，可惜趕唔切今場披甲，連同中場法米尼上輪鬥水晶宮打柴證實要抖3星期，廠仔陣中傷兵確係唔少。好在「死神」艾朗藍斯喺聯賽大爆發，近6場交出5入波3助攻嘅亮麗成績外，新援奧斯爾與箭頭基奧特呢個「奧基配」更合作無間，近6戰各自攻入3球，今晚拍住上繼續入波梗係「奧基（OK）」啦！

兵工廠除咗進攻火力夠，防線亦係入球大嘅「好幫手」，日前英聯盃淨吞車路士兩蛋出局，派遣副選落場輸波情有可原，但連續兩場主場落敗嘅教頭雲格，竟然「自我感覺良好」咁話：「我哋係主場兩連敗，但數據並唔差，最主要係自己送大禮啫。呢種當然係消極諗法，不過積極咁諗，我哋冇畀到太多機會對手。」嗯，卡爾萬聽見後都唔識畀咩反應，淨係知道「廠仔」近11場波9場有失波，今場面對橫掃英倫嘅「SS」組合，根本難保清白身。
利記箭頭4場喪入10球

至於利物浦近期大熱話題，唔使講梗係蘇亞雷斯同史杜列治嘅「SS」數胡組合。史杜列治喺英超開咧至今9場聯賽8場有波入，「產量」夠晒穩定，蘇亞雷斯坐波監期間明顯餓波餓到暈，刑滿復出後場場搶韁，踢咗4場聯賽喪入6球，即刻進佔聯賽射手榜No.3，單計「SS」組合合作4場已經斬殺咗10球，仲全部開晒入球大。對於淨係專注聯賽戰線嘅紅軍嚟講，今場贏波就有可以壓過兵工廠過吓一哥癮，目標明確加上「有SS有大」咁好路，幾大都追多鋪啦！
Data King 交手旺開和追得過

今場英超「雙紅會」，阿仙奴與利物浦雙方射手近期着晒火，除咗值得買定入球大等睇入球騷，翻查往績，佢哋對上15次對碰，雖然例牌踢到飛沙劈石，不過當中有8場打和收場，比率超過5成，不妨冷吼3.35倍和波。
Data King 史杜列治英超9戰8場入波

‧紅軍前鋒史杜列治今季9場聯賽8場有進帳。

‧利物浦箭頭蘇亞雷斯近4場攻入6球。

‧雙方近15次對壘，和波次數多達8場。