今日又係潘頓世界

猪拉多纳

　　目前潘頓已經贏咗21場頭馬，韋達有16場，相差唔算好多，如果後者手風順，三兩個回合隨時追到平手，過埋頭都仲得，總之，佢兩個肯定有排鬥，一日未到六、七月，都未必咁早分到勝負。

　　上個十月，潘頓認真威水，9期賽事次次有馬贏，真係贏到你唔信，好似最近幾期，一日贏三兩場視作等閒，踏入十一月，會唔會繼續當旺，或是輪到韋達威威？不妨拭目以待。

　　人紅，唔可以唔睇高啲，贏馬贏到變魔術咁款，仲要手上多馬騎，今日潘頓場場有馬出，淨係幾匹近績好嘅馬已經有胡叫，睇嚟又係佢世界。

　　第三場「千杯豪情」、第四場「共創美好」及第八場「同友運」，呢3匹新勝馬，剛在潘頓手上勝出，贏來唔係好嘥力，今次再跑相原班同路程，梗有連捷機會。第七場「佳音」，實力在三班足夠，贏得「御鋒」，肯定仲有分在手，今次同場雖有勁敵，實力係旗鼓相當，唔會冇得鬥。

　　最後一提尾場「一言為定」，轉泥地，潘頓即擸回策騎權，似係有計，而上季呢程跑過1次即上名，絕對係有根據，冷門諗得過。(Jack)