羅馬鬆懈隨時甩拖

猪拉多纳

創10戰全勝紀錄未high完

呢期最威肯定係羅馬，聯賽10戰全勝，創意甲史上最佳開季成績紀錄，長追嘅朋友肯定贏到盆滿缽滿。不過亦都係最危險嘅時候，睇到班球員上仗贏波後，即場又跳又叫，好似捧盃咁。必須提防佢哋完成艱鉅歷史任務後，原先爭勝欲望，或隨之消散。羅馬今輪作客對住遇強愈強嘅拖連奴，長勝之路好可能斷纜，博讓球主勝。

（TVB301周一凌晨3時45分直播）

羅馬成績的確無懈可擊，但並非全無隱憂，尤其係鋒線上缺少養傷嘅隊長托迪及謝雲奴後，火力明顯減弱，近兩仗都係下半場先至入波，小勝1比0，贏得好「忟水」，唔好忘記上仗對手只係包尾嘅基爾禾，可見長勝走勢已逞水尾迹象。

另一大隱憂係球員心理狀況，創下破紀錄壯舉，總算對球迷有交代，相信會放鬆慶祝一下。事實上，聯賽係長途賽，難以每場都保持最佳水準，羅馬似已完成一個階段，球員可能仲沉醉於喜悅之中，依家處於最易鬆懈嘅時候，匆匆再戰，令對手有機可乘。
拖連奴神經刀遇強愈強

牌面上拖連奴唔可以同羅馬相提並論，但呢隊「神經刀」遇強愈強，主場對住米蘭雙雄，都唔使輸，即使鬥祖記，亦僅負一球。今仗對住無敵嘅羅馬，反而會激起拖連奴鬥志，盡力一拚。拖連奴翼鋒阿利斯奧施斯腳風奇順，恩莫比尼亦重拾射門鞋，絕對有機會搶到分。