基達菲送華倫主帥一程

猪拉多纳

今日成七十場波，難免花多眼亂，阿King特登揀咗好嘢畀大家，就係西甲早場基達菲主場對華倫西亞，後者今季飄忽到暈，《阿斯報》大爆佢哋高層發出最後通牒，若果今仗輸埋，主帥杜傑便要執包袱，甚至傳出「蝙蝠兵團」已搵定名宿艾耶拉接過呢個燙手山芋，依家士氣低沉，基達菲必定趁機送杜傑一程，平手盤捧得過。

（now 632周日晚7時直播）
華倫眾將唔肯為杜傑賣命

今季冇份踢歐聯嘅華倫西亞演出反覆，試過四連敗後，忽然回勇四連勝，近四仗又輸三場，當然同佢哋年年賣血不無關係喇，教練杜傑巧婦難為無米之炊，但一班高層仍以強隊自居，對戰績非常不滿。《阿斯報》收到風若果華倫今仗不敵基達菲，便即刻請杜帥食豉椒炒魷，佢哋仲搵定杜傑嘅前隊友、2000至07年効力「蝙蝠兵團」嘅功勳鐵衞艾耶拉嚟救火。華倫上周中快車主場對弱旅艾美利亞，喺領先一粒之下，竟然反勝為敗，肉酸到爆，加上高層已動易帥之心，眾將未必會為杜帥賣命。相反基達菲近六聯賽贏五場，主場要贏人心思變嘅華倫西亞冇難度。

至於荷乙芬洛勢頭明顯下滑，上周中仲多踢一場盃賽兼出局，球員攰到爆燈，加上傷兵滿營，今仗主場迎戰近三戰不敗愈踢愈好嘅燕豪芬青年隊，實在冇本錢讓波，捧讓球客勝。最後法甲蒙彼利埃主場對南特，前者今仗有中場耶仙積波亞停賽，上周中於法聯盃踢到加時輸畀索察，力疲心傷，相反南特喺法聯盃輕取羅連安特晉級，兩軍狀態此起彼落，南特有得受讓抵玩。

猪拉多纳