百年一遇威爾斯打呲 藍鳥無懼白天鵝

猪拉多纳

百年抗戰，英超首演！英超今晚爆發史上首場「威爾斯打吡」，由「藍鳥」卡迪夫城主場迎擊老對手史雲斯。雖然話「白天鵝」今季嘅「西班牙革命」成效唔錯，不過佢哋埋門把握力麻麻，撞着「藍鳥」門神大衞馬素爾經常「上身」屢救險球，防線夠硬淨唔似會喺主場輸波，史雲斯讓平半力奇捧1.95倍下盤！（now621台周一凌晨0:00直播）
卡迪夫城門神撲救冠英超

今場嚴格嚟講應該稱為「南威爾斯打吡」對決，至今距離首度交鋒足足有101年，期間雖然兩會都有躋身過英格蘭頂級聯賽，但就未試過喺同一時期發威，所以今場唔只係英超史上首場「威爾斯打吡」，亦係兩軍首次喺頂級聯賽交鋒，可謂百年一遇。

睇排名史雲斯未計尋晚賽事排緊第9，遠高於卡城嘅16位，但其實主隊目前只少「白天鵝」2分，今晚喺主場贏波就可以過頭做番「威爾斯一哥」，班球員落到場肯定同你死過啦！

事實上，卡城今季防守唔算曳，9戰失13球平均每場失1球多啲，但比起佢哋至今畀人射咗61次門，真係唔算太失禮。特別要讚賞係門將大衞馬素爾合共作出44次撲救，係全英超No.1，有呢個鋼門守住最後一關無後顧之憂，前線無論用比拿美、費沙甘保定奧丹維治，都有力偷雞贏埋o架！
史雲斯捧盃盈利1.9億

史雲斯前季升上英超後球場內外都有好成績，場內贏得聯賽盃冠軍，殺入歐霸盃，場外盈利則突飛猛進，日前公布上年截至5月31日嘅財務報告，營業額增長190萬鎊（約2,300萬港元），稅後盈利更達1,530萬鎊（約1.9億港元），絕對抵讚！

領隊米高盧特立引領嘅西班牙踢法，崇尚控球在腳觀賞性極高。唯一要挑剔嘅，係佢哋班前鋒今季發揮麻麻，諸如上季踢到曉飛嘅米捷今季明顯跌Watt，球會史上最貴收購韋菲特邦尼又未上力，二人至今喺聯賽都只係各入2粒，以佢哋今季聯賽累積射咗98次門，都只係入得12球嚟睇，今晚想靠佢哋射爆主隊，難啲囉！
Data King

105回交手卡城佔優

‧兩會過去101年合共交手105次，卡城以43勝27和35負佔優。

‧兩會歷來共27季處同一組別，但未有一方可單季雙殺對手。

‧卡城門將馬素爾今季已作44次撲救，冠絕英超。
乜都玩錦囊 交手旺半和再追

史上首場英超威爾斯打吡，睇怕兩軍面對嘅壓力都唔細，踢法未必太進取。睇埋數據，兩班波近4次交手，有3次開出半場和，「藍鳥」近4戰有3次「半和」，「白天鵝」更係近6次有5鋪半場未分勝負，今場「半場和」有2.05倍，抵玩！