里爾守得穩唔驚摩納哥

猪拉多纳

法甲富豪球會摩納哥喺上場法聯盃第3圈賽事，作客以一球敗走蘭斯，除咗令球隊提前出局外，更打斷今季不敗走勢，今晚作客防守夠晒硬淨嘅聯賽「三哥」里爾，難言穩勝，足智彩開出平手盤，不妨撐2.01倍嘅主隊里爾。

（TVB302周一凌晨4:00直播）
摩納哥作客4戰不勝

里爾今季分別有主帥魯迪加西亞過檔羅馬，翼鋒皮耶、中場泰奧雲、左閘盧卡斯迪治尼又離隊，好彩球會識得搵嚟2011/12球季幫蒙彼利埃勇奪法甲冠軍嘅教練吉拉特掌兵。憑住隊波上下一心，里爾穩守喺聯賽第3位。雖然火力唔算出眾，但勝在得分點多，前鋒沙洛文卡勞、路蘭洛斯、奧歷治等7將已經開齋，可謂防不勝防。而且佢哋防守出色，聯賽只係失咗4球，對上6場法甲亦保持清白身，摩納哥想入波都唔易。

摩納哥今場有射手法卡奧復出掛帥，不過最近傳出皇馬有意喺冬季轉會市場重開斟佢返西甲，雖然摩納哥否認法卡奧會離隊，但或多或少都會影響呢位前鋒表現，既然佢哋近4場作客都贏唔到，今仗都係不宜沾手。