摩力克倒戈舊東家熟晒路

猪拉多纳

鳳凰受讓唔赦勝利

今日澳職不但續有戰火，仲係大家熟悉嘅前港隊教練摩力克登場，率領威靈頓鳳凰作客墨爾本勝利。鳳凰喺摩力克改造下成功「升呢」，克服作客腳軟嘅毛病，而且佢曾執教勝利6年，對方有幾多斤両，可謂瞭若指掌。更何況勝利教練保斯迪高路剛離隊執掌澳洲國家隊，助教梅斯卡特升職坐正領軍，難同老路縱橫嘅「師傅」摩力克鬥，捧受讓嘅鳳凰讓球客勝。

（有線64台周一下午4時30分直播）

威靈頓鳳凰係新西蘭球隊，每次作客澳洲比賽都特別輸蝕。不過摩力克教波功力深厚，將球隊變得四平八穩，有隊形、鬥志強，雖然開季3戰僅2和1負，但過程並唔失禮，早前作客逼和上季常規賽冠軍西悉尼流浪者，屬於鳳凰近年罕有嘅客場代表作。球隊韌力十足，要贏佢哋，並非易事，相信再畀多些少時間摩力克，成績將進一步提升。
梅斯卡特唔夠師傅鬥

摩力克曾於05至11年執教墨爾本勝利，07及09年為球隊囊括常規賽及季後賽雙料冠軍，深受勝利球迷愛戴，相信佢今仗倒戈亦唔會被柴台。值得一提，墨爾本勝利新帥梅斯卡特當年就係摩力克麾下球員，可謂師承摩帥。呢位40歲少帥兩年前開始擔任勝利助教，領軍能力及經驗唔可以同摩力克相提並論，佢有幾多板斧，相信逃唔過「師傅」法眼，因此讓唔起鳳凰。