蘇斯達+1降魔 曼聯傷兵成籮讓唔起

猪拉多纳

今晚歐聯A組矚目之戰，擂台躉曼聯作客皇家蘇斯達。雖然紅魔連贏4場走出低谷，不過中後場積落唔少傷兵，加上佢哋近年作客西班牙戰績麻麻，要讓回勇嘅蘇斯達實在買唔落手，寧願捧1.62倍「讓球主勝」。

（有線64及203台周三凌晨3時45分直播）

曼聯的確氣勢如虹，聯賽連盃賽已經錄得四連勝，尤其係朗尼、尹佩斯同新仔贊奴沙喺前線夾到暈，「小豌豆」查維亞靴南迪斯有得落場一定交足貨，成為球隊復甦嘅主因。可惜好景不常，上仗作客輕取富咸，卻付出沉重代價，拉菲爾達施華、湯卡華利及莊尼伊雲斯先後傷出，左閘艾拉只係死撐到完場，加埋上周操練嗰陣受傷嘅防中卡域克，呢五名中後場主力今仗上陣成疑，搞到主帥莫耶斯頭都痕埋。
紅魔征西冇運行

唔單止傷兵滿營，曼聯貴為英超霸主，近年出征西班牙嘅戰績，真係不敢恭維，紅魔之前6次喺歐洲賽作客「鬥牛國」，只錄得1勝4和1負，其中包括喺歐霸對住實力次一級嘅畢爾包仲要輸埋，認真唔老利。

蘇斯達闊別歐聯10載，季初明顯唔適應兩線作戰嘅壓力，演出大跌Watt，好彩經過早前國際賽期回一回氣後，表現漸見起色，其中金毛仔翼鋒基沙文最為搶鏡，近3場聯賽狂轟5粒，協助蘇斯達狂擸7分重拾信心，此消彼長之下，今仗坐鎮主場絕對唔赦人腳不整嘅曼聯，有得受讓咪錯過。