祖記皇馬喪攻「大」鬥法

猪拉多纳

硬撼億萬雙翼爭出線

歐聯分組賽今晚賽程係對上一個比賽日嘅對壘戲碼主客對調，一堆名牌球隊巴塞隆拿、AC米蘭、同埋祖雲達斯、皇家馬德里繼續互撼。咁多隊名牌當中，以B組嘅祖雲達斯最危，上一輪作客1:2輸畀皇馬後，跌到落小組第3，所以今晚呢3分好重要，既然主場出擊，肯定主動搶攻啦！弊在對手皇馬手上有2億歐元最強火力「C朗+巴利」，大把本錢同祖記撼喎，咁呢鋪1.62倍入球大無走雞喇！

（有線61及201、中央5台周三凌晨3:45直播）
斑馬兵團主場火力勁

邊個會諗到祖雲達斯依家喺B組竟然得2和1負排緊小組第3至得o架，如果今場再有差池畀加拉塔沙雷拋離，最後兩輪就危危乎喇！我諗佢哋喺大班擁躉面前，都唔會話穩守就算，事實上佢哋主場火力強勁，今季6場主場賽事入咗17球，平均每場入差唔多3球o架！

阿根廷前鋒泰維斯雖然唔係嗰啲鋒芒畢露嘅鋒將，但效率絕對一等一，加埋中場維達爾同保羅普巴都有入球能力，如果上輪對皇馬有波入嘅洛蘭迪打番出喺西甲嘅水準，「斑馬兵團」嘅火力會進一步提升，今場佢對住以往喺西甲嘅對手，已經熟晒路，入波機會自然大增啦！
猛火皇馬歐聯士哥王

皇馬喺歐聯分組賽入咗12球，同巴黎聖日耳門並列入波最多球隊。C朗已經着晒火，佢同傷愈復出後愈戰愈勇嘅加里夫巴利拍住上，火力實在好得人驚！就連中鋒賓施馬近期都有起色，今場同祖記鬥攻，大家買定入球大坐定定等睇入球騷啦！
Data King 祖記歐聯3戰不勝

‧C朗近7場轟入11球。

‧祖雲達斯今屆歐聯3戰不勝。

‧兩軍15次喺歐洲賽交手，皇馬取得8勝7負。
乜都玩錦囊 皇馬反擊煞食捧客勝

祖雲達斯今場再失分，就會陷入出局邊緣，所以「斑馬兵團」肯定主動出擊，弊在守將基亞連尼今仗要坐波監，令防線存在隱憂。相反皇馬主力C朗持續大勇，新加盟嘅加里夫巴利愈踢愈好，入波助攻樣樣有，就連射手賓施馬都重拾射門鞋，唔急搶攻嘅皇馬憑住呢3隻快馬不停打反擊，足夠砌低祖雲達斯，撐2.45倍客勝。