冇球星嘅球隊好好教

猪拉多纳

名牌球會教練究竟好唔好做？如果係問曼聯主帥莫耶斯，一定係唔好做，因為佢帶領紅魔鬼頭兩個月成績未如理想，飽受外界壓力同質疑。不過，如果係問多蒙特主帥高普，一定唔係唔好做，因為呢位少帥由緬恩斯轉教多蒙特後，成功打破拜仁慕尼黑多年壟斷德甲嘅局面，之後更贏得雙料冠軍。高普打出名堂後，雖然獲歐洲名牌球隊如車路士及巴塞隆拿等垂青，但佢冇走人反而繼續留隊，因為佢相信冠軍球隊唔係由金錢堆砌出嚟嘅。
「巴塞」打法 高普夠膽識

Peter覺得Dream Team其實係浮誇嘅嘢，11個都係明星球員嘅足球隊好難取得成功，因為牡丹雖好都要有綠葉扶持。高普勤力、有料、睇得通、肯鑽研，夠膽挑戰巴塞用波為主嘅打法。巴塞有球王美斯在陣，高普則研究出高速度、高壓迫、高效率，打造人見人忌嘅德國「蜜蜂兵團」去剋制佢哋。Peter覺得高普好有膽識、見解同立場，所以非常佩服佢。記得當年教荃灣，成隊波都係冇球星，但照樣能夠攞到好好嘅成績，所以Peter絕對同意冇球星嘅球隊真係好教好多。