巴塞狂鋒掃平紅黑兵

猪拉多纳

美斯死火群星頂上入波

球王啞火冇有怕！歐聯奪標熱門巴塞隆拿近排有球王美斯連續4場聯賽冇波入，不過大家可以淡定，事關佢身邊一班好波之人齊齊挺身而出，配角升呢做主角。好似新兵尼馬愈踢愈好做咗西甲助攻王，智利神翼阿歷斯山齊士又已經連續3場入波，今晚巴塞喺H組主場迎戰衰到貼地嘅AC，絕對有力大勝而回，捧1.5倍「讓球主勝」啦！

（有線64及203、中央5台周四凌晨3:45直播）

美斯深陷入球荒令球壇震驚，不過大家唔使大驚小怪，大把射手十場八場冇波入，一旦爆發就擋都擋唔住，最緊要係美斯仔唔係冇做嘢，有佢落場一個牽制4、5個守衞，其他隊友當堂輕鬆晒。事實上，尼馬就係最大得益者，要呢位巴西未來球王每次突破只係對住一、兩個守衞，又有幾多次阻得到佢。仲有個A山，上季畀人話狀態差，近排就踢出真功夫，近3場入波粒粒精彩，呢個前線鐵三角威力唔講得笑。
碧基 艾迪安奴輕傷冇跟操

雖然賽前操練碧基同艾迪安奴都因傷冇跟大隊練習，只係做單獨訓練，但教練馬天奴話佢哋仍然有機會上陣。查實巴塞個魯營主場威力勁爆，單係喺西甲主場就造出21連勝氣勢，今晚AC嚟到仲點會有運行？

AC今季創出史上最差聯賽開季，踢完11輪先得12分排11位。主帥阿里基帥位危危乎，有傳管理層睇埋今場對巴塞及周末對基爾禾成績，就有可能落手炒人，雖然副會長加利安尼賽前強調今場結果係點都唔會炒阿里基，問題係佢自己其實都係傳聞中被太子女踢走嘅目標之一，家陣內部立立亂，班球員仲點樣專心比賽？
AC傳易帥 邦利拿復出救亡

更加大鑊係，佢哋前線「小法老」艾沙拉維繼續養傷，要靠神神化化嘅巴洛迪利拍住未復勇態嘅卡卡，真係信唔過囉。至可憐係後防又係重災區，雖然邦利拿及時康復，被列入18人作客名單，始終仲有迪施基利奧同馬迪亞斯施維斯達傷咗唔出得，陣容不整就算有太子女御駕親征都唔慌惡得出樣啦！
Data King AC今季作客7戰不勝

‧巴塞今屆歐聯傳球成功率達86%，同巴黎聖日耳門並列No.1。

‧AC米蘭今季各項賽事客場共7戰，只得4和3負未嘗勝果。

‧AC歷來24次作客西班牙得4勝6和14負，近5次均未嘗奏捷。
乜都玩錦囊 總入球旺「4」捧埋入球大

今次已經係AC連續4屆歐聯要作客巴塞，對上3次嚟到魯營，AC只得1和2負，要注意係呢3次都開出入球大，仲要係總入球都係4球，所以話雖然今場入球大細中位數係3.5球，2.05倍大都可以再追。想好分啲，可以玩埋4.3倍「4」球總入球。