南球盃8強沙士菲邦到手

猪拉多纳

聽朝南美球會盃上演兩場八強次回合，其中阿根廷勁旅沙士菲主場迎戰巴西「二打六」邦迪比達最為好路。沙軍喺聯賽冇嘢好爭，已經將全副心思放晒喺南球盃，相反邦迪比達喺巴甲仍受降班威脅，邊有精力分心盃賽呀？不妨直取讓球主勝。

（周五早上6時45分開賽）

現時沙士菲喺阿甲位列中游，爭標無望亦不愁護級，可以疊埋心水專攻南球盃，上仗聯賽仲特登收起射手柏拉圖，擺明係留力踢好呢場。對於巴甲弱旅邦迪比達嚟講，能夠殺入南球盃八強已算超額完成，佢哋依家喺聯賽排尾三，護級形勢緊湊，若果唔想做升降機的話，餘下六輪一定要盡力搶分，未必會喺盃賽搏命。首回合沙士菲作客同邦迪比達互交白卷，只要今仗贏波便出線，戰意鮮明，況且佢哋近十仗主場比賽贏咗七場，要贏缺少首席射手威廉祖利亞嘅邦迪比達兩粒冇難度。
利伯泰迪頂到伊達古

另一場南球盃八強戰，哥倫比亞嘅伊達古主場火併巴拉圭班霸利伯泰迪，由於利軍首回合贏2比0，今仗一定會大踢穩陣波，力圖保住領先優勢，加上佢哋經驗遠勝伊達古，可望全身而退，讓球客勝有計。最後美職季後賽四強次回合，波特蘭伐木者主場對住西雅圖海灣者，伐木者近七仗未嘗一敗，首回合作客照贏2比1，不過海灣者有艾迪莊遜同丹普西壓陣，為收復失地必豁出去，隨時合演入球騷，大盤捧得過。