魯賓卡山「讓主」除「根」

猪拉多纳

俄羅斯球隊嘅「山卡拉」主場一向係唔少歐洲球隊嘅夢魘，更何況今晚喺歐霸盃D組要作客去到魯賓卡山個中央球場嘅只係英冠嘅韋根？魯賓卡山主場除咗保住22場不敗兼7連勝外，最緊要係韋根今仗要用到大後備門將李爾高尼斯把關，呢位21歲小將今年9月喺英聯盃擔正對曼城就失5球，擺明未夠班，今晚憑乜去頂住魯賓卡山，主隊讓一球，一於捧2.2倍「讓球主勝」啦！（有線61、64、201及203周五凌晨1:00直播）
韋根焗出小將龍門

魯賓卡山目前喺D組以3戰得7分排榜首，韋根則以5分排次席，換句話講今晚魯賓卡山贏波的話，就會帶離5分，出線自然定過抬油，試問今晚點會唔搏命吖？雖則話佢哋今晚會有首席射手荷西朗頓繼續養傷，但佢哋嘅中央球場的確威力驚人，喺歐洲賽近排取得7連勝佳績兼未有失波，歷來主場兩鬥英超球會都贏晒，今晚韋根唔似阻得到佢哋囉！

韋根主帥奧雲高尼賽前死撐話有信心作客搶分，但睇番佢哋個傷兵名單，前鋒馬隆尼、守將卡達維、拉美斯、門將艾哈比斯同卡臣齊齊因傷缺陣實在令人擔心，大門要由小將李爾高尼斯鎮守，佢之前踢3場英冠話就話未輸過波，但9月尾對曼城之役，就輸夠0:5完全唔掂，踢歐戰靠佢實在牙煙。
歐霸盃D組