大摩行情看漲

猪拉多纳

　　有時唔可以唔信邪，有一講出即爆（煲），所指係文何呢對騎練，之前合作好，幾乎隻隻有WQ，點知上次兩駒，最叻得個P，真係有失望。唔知今期又會唔會開口夾，出現反底情況，希望唔好發生啦。

　　今期焦點係第八場樂聲盃，出馬足額，呢類一班賽，好難避免大摩、告東尼出馬多，今次亦唔例外，大摩4駒、東3駒，輪到邊個弗？盃王行情比較看漲。

　　主力會係邊一匹？「旗幟鮮明」、「閃爍武士」、「海鑽石」及「超皇鷹」任君選擇，睇賠率做人，最唔閃係「閃爍武士」，獨贏一滴飛都冇，冷到廿幾三十倍，爆完缸復出，似係仄場先。

　　另外3匹，最熱係「旗幟鮮明」，隔晚獨贏賣到3倍唔夠，有熱得過分，但亦冇法子，莫雷拉效應使然，依家騎豬都熱，更何況係呢匹馬實力強，作為爭盃主角，合情合理。

　　餘下兩駒，「海鑽石」突配郭能，好似有睇頭，但係咪馬偉昌唔吼，未必冇可能。「超皇鷹」跑完場谷草，由阿莫操刀，後上接近，可能已試準，唔通大摩一招移形換影，咁就好分。