贏到爆易配變身

猪拉多纳

　　又要不厭其煩講一次，但凡周末賽事，啲冷門經常無啦啦走出嚟，熱門就無緣無故死火，唔係話場場發生，普遍次數係比較多，我純粹憑記憶，讀者們亦大可翻看之前10月16日周末賽事，有幾多匹冷馬跑入前列，就知阿棟唔係吹水。

　　第六場四班1400米。「無敵劍俠」上季成績唔多好，實力唔高，今季則要改觀，跑兩場，前仗1200米後上露光，上次加程200米，即刻有Q，輸畀隻贏完又贏嘅「吉利高」，賽績唔係失禮噃。

　　上賽之後，「無敵劍俠」隔番一輪再出，笠番個眼罩上去，老苗有成個月諗計，用得呢一着，唔應該計錯數。而今場對手唔強，水鬥水，佢就進步緊，有機會坐正。

　　第七場三班1200米。「贏到爆」上次初出用歐道樂，梗係唔係波，點解我會咁講，因為時至今日，馬季跑咗兩個月嘞，方仔有幾多次用歐道樂呢？咪就係僅止一次。但講到上場走勢唔係冇，末段追上嚟個勢好好，應該係方仔意料之外，如果唔係，唔使立心操足個幾月先再攞出嚟跑，今次用得巫斯義，路程唔同，變身此其時。

　　海鑽石火燒唔熱

　　第八場一班1400米。大摩今場點兵4件，我唔知會唔會捉錯用神，因為盃王出名多計，當你以為係呢隻，點知到頭來係另一回事，不過，站於菠菜立場，「海鑽石」1400米往績好，今場火燒都唔熱，實有賠率，雖然一班可能失勢，負磅唔重，未必冇得鬥，可以小注WP。