恒大勢炒FC首爾

猪拉多纳

捧盃獎賞1.6億人仔

今夜勢成中國近代足球史上重要一頁，中超霸主FC廣州（廣州恒大）喺亞洲冠軍聯賽（亞冠盃）決賽次回合主場迎戰南韓代表FC首爾，兩軍首回合喺首爾踢成2比2，恒大捧盃就可成為首奪亞冠盃嘅中超球隊，今屆總獎金更可突破1.6億元人民幣，為名為利，全軍將士定必搏命，有力大勝對手稱王，大盤係投X首選！

（now 670周六晚8時直播）

恒大首回合客場照攻，憑艾傑臣及郜林建功一度領先2比1，戰至尾段被FC首爾王牌射手丹恩奴域射入逼和，但仍揸住兩個作客入球，形勢大好。中國足球霉咗好多年，上次有球會殺入亞洲頂級賽事決賽已經要追溯至98年，當時大連萬達喺亞洲冠軍球會盃（亞冠盃前身）屈居亞軍，而遼寧東藥（現為遼寧宏運）就喺90年奪冠，亦係至今唯一稱霸亞洲頂級賽事嘅中國球會。依家踢緊嘅亞冠盃喺02年改制，恒大奪冠即可創造歷史。
納比孔卡盼完美告別

恒大老細許家印搞波為名大灑金錢，球員踢波梗係為利啦，大軍喺今屆亞冠盃累積近1.39億元人仔獎金，今場贏埋獎金增至1.47億，加埋亞洲足協獎金總數可達1.6億，又係中國球壇歷史新高。盛傳恒大嘅意大利名帥納比帶隊贏埋亞冠盃就會改教中國國家隊，隊內主將孔卡亦去意已決，上場聯賽結束後着住寫上「感謝」嘅背心向球迷道別，有乜好過捧埋亞洲冠軍獎盃作為告別禮先！恒大主將張琳芃同穆里奇傷勢無礙，可以夫添出擊，勢必猛攻對手。

FC首爾主帥崔龍洙話過廣州只靠艾傑臣、穆里奇同孔卡三大外援，佢哋又何嘗唔係靠晒黑山神鋒丹恩奴域呢，呢個外形勁似伊巴謙莫域嘅超級射手，喺亞洲賽事直頭好似伊巴咁堅，將成廣州防線心腹大患。內地傳媒指廣州準備好晒慶祝活動，最忌佢哋太囂，但只要發揮應有水準，正路可以大勝捧盃。今場由巴林球證舒拉拿執法，賽制方面，兩回合賽和先計作客入球，再和就加時，加時唔計作客入球，最終打和要互射十二碼分高下。

納比（FC廣州）：廣州依家可以代表中國足球，呢場波好重要，我哋絕對尊重對手，同時希望有運氣之助，喺全場球迷支持下贏得亞冠盃！

崔龍洙（FC首爾）：廣州水平已經超出亞洲球隊，但係足球有好多偶然性，我哋班球員爭勝意志比之前更強烈，佢哋知道要做乜，我反而好輕鬆。