皇馬主場「蘇」哥利

猪拉多纳

兩支西甲歐聯分子今晚正面交鋒，由皇家馬德里喺巴拿貝主場撲擊皇家蘇斯達。皇馬喺周中歐聯雖然畀祖雲達斯逼和，但出線形勢依然大好，最令教練安察洛堤欣慰嘅，係加里夫巴利持續有好表現，同C朗愈嚟愈有火花，呢對「7-11」組合咁煞食，對住板櫈深度一般嘅皇蘇可以秤先，就算讓到「-2」，2.1倍「讓主」都信得過。

（now632台周六晚11:00直播）
皇蘇主力踢到殘

皇馬目前喺西甲落後榜首嘅巴塞6分，要後來居上嘅話再冇失分空間。佢哋近3仗攻入12球，狀態冒升嘅加里夫巴利開始發揮出應有水準，助攻、入球猛咁嚟，絕對有力牽制對手，咁C朗爭取「士哥」自然輕鬆得多，加埋有賓施馬、迪馬利亞等前線球員，真係諗起都覺得恐怖。

皇蘇周中喺歐聯主場同曼聯互交白卷，表現係就係唔錯，但佢哋今季要兼顧埋歐聯，本身隊波嘅板櫈深度已經不足，一周雙賽帶嚟嘅影響遠比皇馬大，一班主力好似卡路士韋拿、阿基列斯、基沙文同皮亞圖等由開季至今甚少缺席，唔踢殘就假啦！今晚疲兵作客入波當食菜嘅皇馬，相信都係凶多吉少！