阿仙奴強勢驅魔

猪拉多纳

「藍神」領軍闖鬼域夠驚客

超級作客王阿仙奴今輪會造訪曼聯，「兵工廠」近年去到奧脫福都凶多吉少，但今季大軍全面升呢，已保持跨季15場作客不敗，喺「奧斯爾效應」帶動下，激活晒成隊波，最犀利係「死神」艾朗藍斯爆發，不但入球如麻，而且入親都係靚波關鍵波，現已成為英超最炙手可熱嘅「藍神」，阿仙奴有佢喺度，嚟奧脫福踩場一樣信心十足，呢支英超榜首雄師有得受讓平半，必捧下盤啦！

(now 621周一凌晨零時10分直播)
費Sir去後 往績難作準

自今年3月起，阿仙奴喺各項賽事保持15場作客不敗紀錄，「神績」包括上屆歐聯作客德國班霸拜仁慕尼黑，以及剛於歐聯戰勝另一強敵多蒙特，上述兩支德甲球隊都屬歐洲一線勁旅，點秤都高過曼聯啦！阿仙奴過去9次聯賽對曼聯只贏1場，兩年幾前更曾於奧脫福大敗2比8，但隨住費格遜一去，一切重新洗牌，「兵工廠」當頭起，而且喺聯賽大把優勢，可以踢得更放更盡，而且今仗只要作客贏波，就可以拋離死敵雙位數字積分（11分），真係乜彩都攞晒。

阿仙奴今季愈戰愈勇，唔少朋友歸功於貴價進攻中場奧斯爾，「大眼仔」傳射皆具分量，確實值回身價，但大家千祈唔好數漏「兵工廠」仲有個超級「藍神」，艾朗藍斯連續兩場大戰利物浦同多蒙特都有士哥，真正大熟大勇，依家經常滿場飛，單計其近仗演出，甚至已經超越謝拉特及林柏特等人成為當今英超最頂級中場，今戰大軍仲有掃蕩王法米尼復出，加埋辛迪卡索拉，兵工廠呢條中場線攻守兼備，打真軍又點會驚曼聯啊！
曼聯防線曳 讓波無理

曼聯雖擁有「兵工廠殺手」朗尼，亦有尹佩斯倒戈，呢對星級進攻組合係好堅，加埋新星贊奴沙，火力極強，只係佢哋條防線長期不穩，開季聯賽10戰失咗13粒，數字屬英超頭8位球隊之中最高，拉菲爾達施華及莊尼伊雲斯等防線主力有傷在身，今場未必踢得，更難予人信心。

查實「紅魔鬼」最大鑊係冇咗費格遜鬧醒班衰仔，喺新帥莫耶斯領軍下，本季聯賽對利物浦、曼城同車路士等勁敵錄得一和兩負，仲要讓波，反硬佢哋啦！

莫耶斯(曼聯領隊)：阿仙奴爭標機會係較高，但今季英超競爭激烈，球季未完仍充滿變數，我哋會盡力避免出現落後阿仙奴11分嘅局面！

雲格(阿仙奴領隊)：我唔知球證以前有冇畀費Sir影響判決，但我只希望所有球員相信自己，要表現出爭勝飢渴感，證明球隊係有料到！