飛天龍駒匆出有計

猪拉多纳

　　多位洋將今季紛紛來港搵食，諸如莫雷拉、田泰安、郭能等，統統乃騎得之人，加上韋達、潘頓和杜利萊等舊有勢力，現今騎師陣容可謂爆晒棚，形成柏寶今次重臨香江，受歡迎程度大大降低，明晚首度登場，可憐地只有兩匹坐騎。

　　今趟回流遭受冷待，柏寶心裏如何想法？料他感覺不是味道。事實上，騎師供應日趨泛濫，韋達停賽？還有莫雷拉；莫雷拉沒空？就搵潘頓吧！總之不愁無人可用。柏寶臨時插入欲分一杯羹，唯今之計得一條路，就是出盡全力打身價波，以求迅速提升人氣！

　　先講柏寶第五場坐騎，「喜寶駒」連仗成熱由韋達搏失，柏寶有幸接手，一定把握搏殺機會，況且此駒本是其嫡系坐騎，上季人馬合作獲兩冠一亞，如今故劍重逢，若然化腐朽為神奇，一洗馬兒季內三戰皆敗之頹風，幕後勢必錫到佢，有助挽回人氣！

　　至於頭場的「飛天龍駒」，剛戰跑後隔三日匆匆再出，舉動殊不尋常。小方與柏寶向來關係友好，觀乎部署，此駒似是專誠為柏寶接風，不排除是洗塵馬，早有準備助騎者頭場即省招牌。