蓋世子牙降班冷變熱

猪拉多纳

　　講到近期當打騎師，點計都係莫雷拉同潘頓，雖然有時啲馬配佢哋會過熱，但係佢哋又真係贏到，雖然周某都知賭馬梗係博冷過癮，但都要中先有錢收，既然佢哋咁弗，熱都要捧。

　　噚晚睇飛，發現有四匹落班馬隔晚好多人支持（見表），當中最誇張嘅，莫過於第四場嘅「蓋世子牙」，相信或多或少係因為莫雷拉肯騎。話說呢匹馬上次喺三班跑田草1400米，閘前嘅獨贏賠率係99倍冷到震，結果當然跑得唔好，只係得第十名。今次落番四班，轉跑谷草1650米換莫雷拉騎，隔晚個W竟然只得3.6倍，仲要一度成為大熱門，啲飛數咁得人驚，點可以唔信？騎師王方面，莫雷拉得1.85倍，賠率方面完全拋甩其他對手，都係捧佢算了。(周仲)