球場上的情與義

猪拉多纳

上星期阿仙奴畀前廠長尹佩斯一頭頂死，而且入完波後佢仲要熱烈慶祝，好多阿仙奴球迷都好唔滿意。因為上年尹佩斯大大聲聲咁話對阿仙奴入波都唔會慶祝，點知佢真係對咁多次阿仙奴就入足咁多球，今次仲要咁大肆慶祝，就好似將舊日情一一洗清，今場仲要同雲格握下手都慳番，當日自稱為阿仙奴天字第一號fans嘅尹佩斯真係飲完忘情水來。
囡囡都不屑尹佩斯所為

其實除咗阿仙奴球迷覺得佢慶祝入波係忘恩負義外，連尹佩斯囡囡迪娜都對佢好反感，雖然迪娜只有四歲，但真係由出世至今都係睇阿仙奴大，見到爸爸由廠長變成魔鬼，佢真的視佢爸爸為叛徒。迪娜甚至話見佢尹佩斯同費Sir合照就嘔了，我估呢場波令迪娜嘔到反胃都似，所以話踢波真係唔係運動咁簡單，有晒師徒情、兄弟情同親情，當中嘅恩怨情仇真係好睇過戲呀。聽晚《球分》同大家數一數！

（now 101周五晚10時30分直播）

其實入波慶祝係足球嘅一部分，入波咁激情，而且仲要係一個咁重要嘅入波，好難唔慶祝既，除埋衫慶祝讓一班女球迷開心下就更好！（我Lulu覺得基奧特入波除衫最好）
為世界着想撐法國

今個星期因為世界盃外圍賽附加賽，英超暫定一周，但比賽一樣咁好睇，當中烏克蘭對法國就最引起我留意，要知道足球於法國就如同信仰，如果法國入唔到世界盃，我估佢哋暴動都似，到時法國經濟就更差，之後影響到歐洲債務問題，全球經濟再陷入危機……為咗世界着想，法國你都係打好少少，殺入世界盃啦。

（now 635周六凌晨3時45分直播）