富明尼斯炒教頭難克「迪」

猪拉多纳

巴甲進入白熱化階段，衞冕嘅富明尼斯深陷降班漩渦，歷盡球會高低起伏嘅隊長費特傷患纏身，白白睇住球會戰績一蹶不振，名帥盧森保高日前更落鑊被炒，今輪迎戰篤定降班嘅紐迪高，1.2倍主勝隨時係糖衣陷阱，寧吼3.75倍「讓客」好過！

（開賽時間：周五早上7:00）

富明尼斯功勳教頭艾保巴拉加季初落鑊後，名帥盧森保高接手雖然有過蜜月期，但10月頭開始表現直插谷底，連續9場冇贏過，最終喺星期一被炒魷魚，兩大名帥都搞唔掂，筆者真係唔信「臨時工」性質嘅杜利華祖利亞，接手短短幾日時間可以改變到啲咩。
紐迪高射手問鼎最佳金球

況且富明尼斯目前問題癥結係隊長費特長期養傷，自從佢9月受傷缺陣開始，球會戰績隨即下滑，須知道佢喺上季聯賽狂入廿球協助球隊稱王之外，09年成功護級亦係靠佢季尾大爆發，喺最後7輪打出一段6勝1和強勢，富明尼斯繼續缺少呢位靈魂人物，根本難有作為。

紐迪高雖來季篤定降落乙組，聯賽8連敗亦似乎處於放棄狀態，但值得留意嘅係佢哋對上嗰場贏波對手，正係要搶分護級嘅邦迪比達，今場再鬥「同級」嘅富明尼斯，有權爆冷。再者箭頭桑奧利華拉之前鬥利斯菲體育會射入嘅世界波，日前入選國際足協年度最佳金球候選名單，聽朝遇着富明尼斯防中艾甸奴及中堅安達臣加斯安尼停賽中門大開，梗係要趁機再展示精湛射術！