法國唔夠團結 難讓烏克蘭

猪拉多纳

另一場歐洲區世盃附首回合好戲，烏克蘭喺主場迎戰法國，雖然「高盧雞」有拜仁巨星兼金球獎熱門列貝利壓陣，但總嫌佢哋唔夠團結，加上忌憚烏軍高路比恩卡同耶莫蘭高兩隻快翼，相信領隊迪甘斯會穩字當頭，唔會冒進，仲要讓波純粹係名牌效應，下盤有買趁早。

（now 635周六凌晨3時45分直播）

法國嘅實力毋庸置疑，可惜主帥迪甘斯始終未能將麾下嘅猛將凝聚起嚟，搞到列貝利、拿斯尼、賓施馬等猶如散兵游勇，球隊又欠一名施丹級數嘅神級人物領軍下各自為戰，去到今仗附加賽生死關頭，如果再唔團結就認真擇使。雖然近3仗法國全勝回勇，但對手只係芬蘭、澳洲及白俄羅斯之流，就算贏晒都好難令人信服。
迪甘斯不敢冒進

烏克蘭喺今屆外圍賽表現不俗，最終僅以1分之差屈居英格蘭之後要踢附加賽，睇番今次大軍名單，除隊長泰摩斯卓克喺俄羅斯搵食之外，其餘全屬國內土炮，默契十足，其中兩名翼鋒高路比恩卡同耶莫蘭高速度極快，變相可壓制法國兩閘沙格拿及艾拉嘅助攻。

由於法國先客後主，預計領隊迪甘斯喺首回合會小心翼翼，務求唔輸，留待返主場先砌佢都未遲，今仗法國讓波唔抵玩，不妨轉捧讓球客勝。