意德瘋狂教頭大駁火

猪拉多纳

卸下壓力 放懷閱兵

意大利主帥柏蘭迪利昔日帶領費倫天拿時代已經係著名嘅進攻足球支持者，到佢2010年接過納比手上嘅意軍教鞭，初期都唔敢太放肆，仍然維持番意軍一向嘅穩守為主踢法，但佢流住嘅係瘋狂血液，到去年中歐國盃決賽周期間已經抑壓唔住野性，意大利踢法從此變得非常性感，喺近年半以來意軍踢過嘅24場國際賽，當中有18場總入球達到3個以上，開大率達75％，而且面對強敵都唔縮，曾經作客2比1贏德國、作客吞西班牙4蛋、熱身賽和巴西2比2、之後協會盃再對巴西輸2比4，今年8月熱身賽主場對阿根廷輸1比2。何況柏蘭迪利習慣喺無關重要嘅賽事不斷試人，上月中最後兩場世界盃外圍賽，喺篤定出線下踢到有前冇後，面對弱旅丹麥同阿美尼亞都各失兩球，今仗當然唔會保守，何況後防大將基亞連尼因傷缺陣，近期不穩嘅防線戰鬥力將進一步削弱。
德軍近20戰9成半大盤

不過講到喪，柏蘭迪利嘅意大利仍然遠遜勒夫嘅德國，德軍喺勒夫手上，進攻節奏流暢悅目，變化多端，不過後防欠穩一直係佢解決唔到嘅死穴，德軍自去年中至今踢咗20場國際賽，竟然有19場開出大盤，開大率達到瘋狂嘅95％，當中4比4和瑞典、3比4負美國、3比3和巴拉圭同上月作客5比3贏瑞典都係經典。德軍今仗唔齊腳，一雙箭頭高路斯同馬里奧高美斯受傷缺陣，但勒夫近期進攻線都習慣咗冇呢對箭頭，火力一樣強大，但防線欠缺梅迪薩卡亦有損失，今晚面對多年來苦主意大利必然渴望贏番場一吐烏氣，入波又點會少？