英軍逃兵成籮益晒智利

猪拉多纳

英格蘭今仗將喺主場同智利拍跳，但「三獅兵團」有多名主力稱傷避戰，相反智利近年進步神速，今仗受讓可取。

（now 621周六凌晨4時直播）

英軍今仗出現大量「逃兵」，史杜列治、卡域克、韋碧克等主力皆因傷缺陣，當中以隊長謝拉特缺陣影響最大，預料一對修咸頓新兵拉爾拉拿同積洛迪古斯將獲得正選上陣機會，但佢哋可唔可以好似安祖斯唐辛咁突然彈起真係好難講，到時前線靠晒朗尼真係獨力難支。後防方面，雖然鶴臣力撐門將赫特畀佢打正選，但赫特日前喺操練中被影到救波救到手忙腳亂，仍然係甩甩漏漏，真係畀唔到人信心。
智利近9場未輸過

況且英軍班大帝喺呢啲「太公波」未必會搏盡，佢哋寧願留力下仗對德國，以報10年世盃嘅一戰之仇。相反，智利有主力前鋒阿歷斯山齊士在陣，有力射破蝦碌門將赫特嘅十指關，而且智利今年狀態不俗，近九場不敗，今仗有望延續此佳績，捧讓球客勝。