烏克蘭銅牆頂住法國

猪拉多纳

7場冇失波雙翼夠煞食

今晚世盃附加賽首回合輪到歐洲8支雄師廝殺，其中烏克蘭會於基輔會師法國。烏克蘭「核彈頭」舒夫真高掛靴後，陣內出名球星雖然寥寥無幾，但分組賽防守固若金湯，失球數字僅次衞冕王者西班牙，絕對稱得上實而不華，「高盧雄雞」法國作客嚟到怕且叫唔響，吼實1.55倍+1「讓主」啱數。

（now635台周六凌晨3:45直播）

連同世界盃分組賽及熱身賽，烏克蘭近11場9勝2和不特止，最近7場更係冇失過波。佢哋防守咁硬淨其實唔難理解，除咗隊長泰摩斯卓克効力俄超辛尼特之外，其餘骨幹球員均由迪尼普、基輔戴拿模及薩克達呢三支烏克蘭勁旅組成，門將比耶托夫與其中三名後衞古查、舒夫卓克及拉傑斯基全部嚟自薩克達，平時喺球會夾慣夾熟默契夠，落到場錯漏自然少。
烏克蘭雙箭迪甘斯都驚

喺分組賽階段豪取28球嘅烏克蘭，雖然其中17球係喺「極品魚腩」聖馬力諾身上取得，實際鋒力並非想像中咁強，不過高路比恩卡與耶莫蘭高嘅雙翼齊飛絕對唔可以睇小，就連法國領隊迪甘斯喺賽前記招，都點名讚揚佢哋為「最具殺傷力武器」，就知呢雙翼鋒有料到。

至於法國教頭迪甘斯除咗點名盛讚烏克蘭雙翼，仲提醒球員要提防迪尼普前線孖寶沙列斯尼約夫及蘇素亞。聽見迪甘斯咁講，筆者相信佢首回合會以防守為主，兩閘艾拉、迪保治疊瓦助攻場面隨時少之又少，就算金球獎候選熱門嘅列貝利近況唔錯，可惜缺乏隊友後上拉空未必攞到甜頭，而踢單箭頭嘅基奧特亦唔擅長單打獨鬥，作客面對烏克蘭環環相扣嘅防守，未必咬得入對手。
Data King：法國半場旺開細

‧烏克蘭近11場9勝2和未輸過。

‧烏克蘭近5仗主場出戰不失1球。

‧法國近10場比賽半場開出1大9細。