伊巴謙C朗鋒神「大」戰

猪拉多纳

葡萄牙 瑞典爭世盃入場券！

「鋒神大戰」今晚爆發！葡萄牙同瑞典會合演歐洲區世盃外附加賽首回合，焦點當然係葡國巨星C朗，惡戰狀態大勇嘅瑞典猛將伊巴謙莫域啦！葡萄牙領隊保羅賓圖一早講明雙方實力不相伯仲，勝負難料，但兩軍都有「鋒神」壓陣，入波當然唔會少，撐2.05倍入球大啦！

（now632台周六凌晨3:45直播）

C朗同埋伊巴謙莫域絕對稱得上係其中兩位當今球壇最強嘅前鋒，難怪大部分傳媒同球迷都認為，呢場波係屬於佢兩個之間嘅對決。伊巴謙近期的確弗到漏，除咗上仗聯賽大演帽子戲法，最近兩場歐聯夾埋更勁入5球，當中包括1次大四喜，難怪佢自己都話：「雖然已經32歲，但我仍然不停咁進步緊o架！」
伊巴謙最叻入靚波

最緊要係呢位瑞典「殺手」嘅「士哥」幾乎球球都係靚波，佢喺上年11月對英格蘭嘅倒掛遠射，更入選咗FIFA最佳入球獎最後10強，絕對係大熱之選，有佢領軍，極有機會可以隊番葡萄牙一兩粒。
C朗近4戰喪轟9粒

至於有主場之利嘅葡萄牙雖然被睇高一線，但領隊保羅賓圖都好老實，認為兩軍實力非常接近：「佢哋對愛爾蘭曾經落後（最後反勝2:1），對住德國亦曾經被連入4球（最後和4:4），證明佢哋嘅鬥心非常之強。」要抵擋強敵，當然要靠近排勁好火嘅C朗啦，呢位葡萄牙萬人迷連續4場球會賽事入波之餘，夾埋更有9粒「士哥」，狀態同伊巴謙一樣咁弗，對住攻強守弱、近5場得1仗冇失波嘅瑞典有力數胡，各位球迷今晚真係要坐定定，(目及)實呢場入球大戰喇！
Data King：兩軍近排多士哥

‧葡萄牙近6次主場鬥瑞典僅得3和3負。

‧葡萄牙連續12場有波入，近8戰僅錄1敗。

‧瑞典連續8場有波入。
乜都玩錦囊：瑞典攻強守弱靠唔住

雖然葡萄牙同瑞典各有猛將，但葡萄牙話晒有主場之利，球員平均實力亦都秤先，尤其喺防守方面，瑞典近5場只得1場冇失波，上仗世盃外面對火力強橫嘅德國更加失足5粒，證明呢隊波有前冇後，反觀葡萄牙近4次喺自己地頭出戰都未試過失多過1粒，有力憑防線嘅分野喺首回合贏波，撐入球大之餘，1.5倍主W亦值得熱捧。