尼馬Solo愈唱愈強！巴西「洪」星「大」騷娛賓

猪拉多纳

「新球王」ShowTime！2014年世盃東道主巴西，聽朝就會喺美國嘅熱身賽之旅鬥洪都拉斯，「森巴軍」主將尼馬為咗證明自己有能力接替美斯，成為真正嘅「最強球王」，肯定會搏晒老命喪攻顯身價！對家洪都拉斯早就攞咗世盃入場券，鋒力又唔曳，呢場波捧1.57倍入球大最啱數喇！

（TVB 301周日早上8:30直播）

尼馬加盟巴塞初期，一直有唔少評論認為呢位「新球王」根本未夠班，好彩，隨住近日「真球王」美斯受傷，尼馬補上佢嘅核心位置反而踢得仲好，似乎佢真係要擔正大旗先可以放心Solo喪攻喎！
名宿讚「最強球王」係奇才

可能因為咁，喺巴西幾乎係單天保至尊嘅尼馬，近4場國際賽已經有3球進帳，表現愈嚟愈成熟，連以隊長身份率領巴西捧走1970年世盃嘅名宿卡路士阿爾拔圖，尋日都忍唔住走出嚟激讚「最強球王」：「佢（尼馬）真係一個奇才，今場比賽大家就會見識到，巴西其實有好多好球員，希望佢哋可以回復昔日嘅輝煌啦！」

仲有呀，經驗老到嘅前鋒祖奧及侯克，同埋連續兩場國際賽都有波入嘅奧斯卡杜斯山度士，都可以後上兼幫尼馬開路，據講史高拉利今場將會變陣，門將施薩索拉斯同防中路爾斯古斯達禾會復任正選，丹尼爾喺操練中一度受傷，如果唔得會由狀態大勇嘅馬爾干頂上，鋒力一樣咁強。唔怪得巴西近12戰只係得1場冇波入，至且場場都至少轟兩粒，今次對住防守麻麻嘅洪都拉斯，相信有力再開入球騷。
洪都拉斯近8戰例有波入

洪都拉斯陣中雖然有侯城後衞美羅費古羅亞同史篤城中場柏拉西奧斯壓陣，但佢哋喺英超只屬於二、三線球員，難同「森巴兵團」嘅星級鋒線抗衡。唯一值得留意嘅，係佢哋近8戰僅得1仗食白果，踢緊中超貴州智誠嘅卡路哥斯利近4戰國際賽仲斬獲3粒添，就算「洪軍」難逃一敗，分分鐘都偷到雞入番1、2粒，個入球大隨時未到半場已經開咗啦！