韋達尾兩場最掂

猪拉多纳

　　韋達停賽期滿復出，喺佢停賽那段日子，潘頓及莫雷拉係咁搏命贏馬，淨係最近3次賽事，潘已經擸咗7場頭馬、莫5W，目前韋達仍然排第二，但頭馬與潘相差近一倍，而莫又以強勢殺緊上嚟，呢位十三屆冠軍唔通最後畀人踢出前兩名？都唔係冇咁嘅可能！

　　今次賽事潘莫照舊好多馬騎，韋達都唔執輸出馬9匹，貨比貨又點呢？硬係覺得佢手馬冇兩大紅人咁強，唔係話冇機會贏，會唔會喺復出首戰即刻狂數胡，有多少保留。

　　但又唔可以否定韋達呢期豐收嘅可能性，事關好多時物極必反，潘莫唔可能長勝，二人個勢炒得熱騰騰之時，或者離失手之日不遠矣，呢啲橋段真係見得太多太多。

　　紅衣巨龍未輸過

　　如果輪到韋達擔正，尾兩場最有機會包辦孖寶，第十場「貝利奇」，演出一直好堅，跑咁耐未甩過前五名，上到三班仲可以也文也武，實力未見底。第十一場「紅衣巨龍」，上季未輸過，今季未跑過，蔡神仙好揀唔揀，係要揀大賽日復出，肯定係想威。（Jack）