財寶星易配出頭

猪拉多纳

　　今日有3項盃賽，盃王大摩場場有馬出，淨係呢3場出馬11件，真係多到嘔，會唔會全部畀佢贏晒，唔係冇可能，佢亦唔係未試過類似經歷，早已證明佢係有能力辦得到。當然，爭盃人人想，淨係有鬥志係唔夠，仲要有天時及地利。

　　第一場四班1400米。「伽楠」初出1200米輸得接近，再出改跑呢項路程，輸畀1匹星球馬，冇得好講啦，人哋「戰利品」以晨操姿態按住返嚟，唔係超你幾班，點可能以遠距離彈甩，但亦都證明前駒轉跑中距離更加合腳法。

　　今場搵嚟搵去，都冇星球馬在陣，除非幾匹初出馬隻隻惡，如果唔係，照我睇，「伽楠」係坐二望一之馬。

　　第五場四班1400米。阿棟決定博「財寶星」，冇他嘅，近兩仗睇到心噏，都唔知馬偉昌跑咩馬，連續兩場遊魂咁返嚟，仲有本事跑到四五名，嘩，呢隻馬狀態肯定在勇境。今次高伯新用到韋達，又好好運排到中檔，取位錯晒可能性減低，本身在四班係有實力，唔應該冇出頭機會。

　　第九場二級賽1200米。「綽力之城」一向係阿棟愛駒之一，唔係話呢類馬成日贏就一定係愛駒，本着演出穩定、跑得就唔欺場呢兩個重點，係我喜愛呢匹馬嘅原因。

　　綽力之城爭盃要角

　　事實上，綠茵場上多啲「綽力之城」呢類馬、呢類馬主，就會畀人一種正氣之感，好過贏1場即閃，之後唔知幾時有仇報嗰類。總之，呢匹馬路程啱又當打，梗係爭盃主要角色之一。（陳華棟 資深評馬人）