噴射機衝散殘陣獅吼

猪拉多纳

希斯基復出擔大旗

今日澳職獨腳戲由「二哥」布里斯班獅吼造訪紐卡素噴射機，咪以為獅吼排名較高就可以開W，查實佢哋今仗陣容不整，撞正噴射機有「好腳頭」主將希斯基正式復出擔正，獅吼莫講話要贏波，隨時輸埋都唔出奇。足智彩開獅吼讓平半，力奇寧願捧1.86倍下盤。

（開賽時間：周日下午2:00）
獅吼5件主力唔踢得

11同12年冠軍獅吼今季重現班霸本色，開季5戰贏4場轟入10球，當中仲有7個人入過波，得分點多的確唔易守得住，但問題係佢哋今仗唔齊腳，包括前鋒貝利沙、中場米拿同守將史堤芬魯圖都話有傷唔踢得，另外又有中場麥特麥基同守將法蘭積要隨澳洲隊出戰國際賽，夾夾埋埋冇咗5件主力，戰鬥力即時減半，獅吼今鋪隨時叫唔出聲。

噴射機開季踢到第5輪先開齋，頭3戰仲要連波都入唔到，但話佢哋表現好差咩？又唔係喎！自從開咧戰不敵FC悉尼後，噴射機就再冇輸過波，其中前仗對住上屆澳職季後賽總冠軍中岸水手，仲一度領先2粒，只係後半段連失2球先拎番2分出嚟啫。

到上輪作客阿德萊德聯，噴射機憑查利安斯同阿當泰加斯建功領先2球，不過今次主帥加利雲艾蒙醒目喇，喺最後25分鐘換入傷愈冇耐嘅希斯基壓場，呢位前英格蘭國腳經驗豐富，最後果然好腳頭幫球隊頂住贏2:1開齋，今鋪希斯基有望擔正，就算中場米治谷巴養傷都冇有怕！