彼德堡恰慣華素爾唔怕追

猪拉多纳

今日賽事唔多，阿King揀咗場英甲直播華素爾主場鬥彼德堡做重心，彼德堡對上4次鬥華素爾全勝，加上今場多名主力傷愈復出，夫添出擊勝算高，小讓平半捧上盤。

（TVB 301周二凌晨3時45分直播）

由於聯賽榜排第2嘅奧連特前晚主場不敵普雷斯頓，排第3嘅彼德堡只要贏波便有機會收窄距離。彼德堡對上4場作客聯賽贏3場，其中贏波3場全部冇失波，表現好穩定，而且上周中英錦標對杜根咸因傷未有上陣嘅中場積克彼尼、路維及丹尼爾卻恩斯已經好番，中前場齊腳更添信心。

華素爾今季主場對前列嘅普雷斯頓、巴拉福特俱輸波，而且過去4次於英甲鬥彼德堡均落敗，被對手恰死，客軍讓平半上盤信得過。
阿根廷冇美斯難贏「波」

另外英足盃第一圈重賽，非聯賽球隊巴克利上次作客都能打和英甲基寧咸，今次返主場更加唔會怕。基寧咸上周末聯賽作客錫菲聯雖然贏波，但事隔兩日要匆匆再戰，作客讓波信唔過，捧讓球主勝。最後國際熱身賽阿根廷於中立場美國鬥波斯尼亞，阿根廷冇咗美斯進攻死晒火，上場熱身賽僅以0比0悶和厄瓜多爾。波斯尼亞係近年新興勢力，迪斯高、伊比斯域及比真歷都有級數，對住冇牙老虎阿根廷唔輸蝕，捧讓球客勝。