英格蘭 德國「大」打出手

猪拉多纳

謝拉特打止痛針 第108次「戴帽」

歐洲今晚除咗有世盃外圍賽，其實仲有場矚目大戰，就係英格蘭主場迎戰德國喇！「三獅軍」話明想報番上屆世盃被對手踢出局嘅恥辱，又有史杜列治回歸拍住朗尼，鋒力相當得人驚！雖然德國今次係半力出擊，但仍然有馬里奧葛斯等喪攻好手壓陣，咁嘅環境，梗係撐1.75倍「入球大」啦！

（now621台周三凌晨4:00直播）
史杜列治傷愈披甲

相信大家都仲記得上屆世盃16強，林柏特射入罰球被「屈走」，搞到「三獅兵」含冤出局。今次再戰德國，英格蘭上下都磨拳擦掌想復仇，今日攞到第108頂國腳喼帽嘅中場謝拉特，仲決定打止痛針頂硬上，踢熱身賽都咁有鬥心，認真少有！但點都好，有呢位紅軍大佬喺度幫手校炮，「三獅軍」嘅創造力肯定靠得住，配合佢嘅球會隊友史杜列治、紅人翼鋒安祖斯唐辛同狀態大勇嘅朗尼，要入波應該唔成問題。

對家德國賽前傳出今仗會收起中場奧斯爾、守將拿姆同門將紐亞，等呢班人抖抖，不過大家唔使擔心，「日耳曼軍團」都仲有大把好波之人，能傳擅射嘅馬里奧葛斯同馬高列奧斯今仗會齊齊列任正選，既然雙方都有力破門，玩「入球大」當然係最明智嘅選擇啦！