上海先鋒加程到位

猪拉多纳

　　天文台預測，今日可能會有雨，係過雲雨定係灑個不停，要到時至知，正係天有不測之風雲！正如做人一樣，三衰六旺，想避都避唔到。大家睇吓近期嘅潘頓，就知道咩叫做旺，頭馬多到瀉，今期仲要冇咗莫雷拉，贏三兩場有咩咁奇。

　　第一場五班1200米。「上海先鋒」今季跑兩場，成績愈來愈好，前仗跑到冇影，但上場1000米路短一樣衝得勁，末段在外檔殺上嚟幾有勢。

　　呢類皮包骨嘅馬，真係好蝦人訓練，跑得多又唔得，跑得少，狀態難以提升，阿威接手後，隻馬跑極冇點跌過磅，證明用啱方法，亦預期隨住多跑之後，進度更加紮實，今仗加程配合，係時間出擊。

　　第三場四班1200米。「元豐泰」現時40分尷尷尬尬，吳定強係都唔報五班賽，唔通今晚成人之美，特登畀同主「曜豐泰」跑頭場，自己在四班捱多1場先？阿棟唔敢話冇咁嘅可能。不過，大家都知呢位練馬師手法變化多端，邊有咁易畀我哋估得到，可能虛則實之亦未定。同埋，如果今晚有雨，呢匹馬以前贏過黏地，1檔放頭走份外醒神，爆冷唔意外。

　　旋風魅力後勁派用場

　　第六場三班1200米。「旋風魅力」信心談不上，冷門博博吓，因為目前62分，米高鄭可能會等降班再作打算。

　　之但係，今場形勢好啱呢匹馬發揮，嘩，望一望同場放頭馬，為數3、4匹咁多，早段點會慢得去邊，佢嘅後上性能可以大派用場。