烏拉圭「約」定Fans開慶功P

猪拉多纳

半隻腳踩咗入決賽周，烏拉圭聽朝帶住5:0嘅優勢返主場再戰約旦，老實講呢場世盃外附加賽絕對係例行公事，不過你話佢哋會揸流攤咩，亨格比利又覺得未必。事關烏拉圭主帥泰巴尼斯承諾強陣出擊回饋球迷同世盃奪冠功臣加基亞，全隊上下都準備喺世紀球場開P慶功，睇個勢會炒多約旦一鋪，就算讓到「-2」，1.65倍「讓主」都捧得過。

（開賽時間：周四早上7:00）

今場波喺蒙得維的亞世紀球場舉行，賽前烏拉圭足總會安排一項頒獎儀式，向86歲名將、幫烏拉圭喺1950年世盃決賽射死巴西嘅加基亞致敬。據悉，今仗波飛開售7個鐘已經賣咗4.5萬張飛，其餘嗰兩萬幾張日前都清埋，可容納6.5萬座位嘅世紀球場聽朝將會爆滿，領隊泰巴尼斯講明唔會揸流，總之要打場好波同球迷開Party，有佢呢句，上盤客放心晒啦！
約旦球員承認世盃夢醒

首回合烏拉圭作客贏約旦5:0，蘇亞雷斯竟然1球都冇份，呢位仁兄今仗完場後會坐利物浦老闆約翰亨利架私人飛機由蒙得維的亞趕返英國，準備禮拜六嗰場默西賽德郡打吡，相信就算佢唔踢足全場，都肯定會搏老命爭「士哥」先返歸。

對家約旦有幾多料大家心照，中場巴華比承認世盃夢已經玩完，但成班手足為改善國家隊形象，今戰絕對唔會坐以待斃，要同主隊撼過咁話。作客走去同烏拉圭鬥攻咪盞送死，隨時輸得仲甘過首回合都似。
新西蘭 墨西哥演入球騷

同烏拉圭一樣坐定粒六嘅墨西哥，喺世盃外附加賽首回合大勝新西蘭5:1，後者隊長湯美史密夫話首仗輸得咁大單皆因戰術保守，今仗主場出擊實會大舉進攻，對住冇乜包袱嘅墨西哥有望大手交易，捧1.75倍大。

（開賽時間：周三下午2:00）