拉魯斯猛火殺「迪」話咁易

猪拉多纳

足智彩今日只係提供一場比賽受注，呢場南美球會盃4強首回合賽事，由巴拉圭球隊利伯泰迪主場迎戰阿根廷嘅拉魯斯。拉魯斯近況唔錯而且火力夠猛，既然佢哋今場受讓，1.6倍「讓球客勝」值得一試。

（開賽時間：周五早上8:15）

事實上，拉魯斯除咗殺入南球盃4強，同時亦喺聯賽追趕榜首聖羅倫素。雖然要兩邊作戰，不過佢哋愈戰愈勇，近7場比賽贏足6場。而且球隊火力十足，連續4場作客比賽都攻入3球，射手辛迪亞高馬田施華、美拿路等人輪住發威，加上中場蘇莫沙、後衞馬些路靴里拉復出候命，陣容更見完整，今仗有力坐和望贏。
利伯泰迪表現跌Watt

對手利伯泰迪陣中以國內球員為主，中場艾古倫曾効力過維拉利爾。球隊最近氣勢開始回落，上場聯賽更喺主場吞咗瓜蘭尼2蛋，中止咗主場連勝紀錄，今次對住乘勇而來嘅拉魯斯難言穩勝。
南球盃賽制

採兩回合主客制，今場為4強首回合，若兩回合總比數賽和，以作客入球較多一方為勝，若作客入球數字相同，則在次回合90分鐘後互射12碼決勝。