阿些斯奧做東起賽

猪拉多纳

炒咗銀狐　球員「精神」

經過一輪激烈嘅國際賽後，今晚各地聯賽重燃戰火，其中法甲獨腳戲阿些斯奧主場迎戰馬賽值得留意，雖然照秤馬賽實力贏成條街，不過佢哋狀態認真麻麻，加上嚟緊有歐聯後顧，今仗未必會搏盡，相反阿些斯奧易帥後有啲起色，阿King認為不妨冷敲讓球主勝。

（TVB 301周六凌晨3時30分直播）

歐聯獎金豐厚，出場、贏波、轉播費逐樣計，都咪話唔和味，因此有得參加嘅球隊難免分心，馬賽就係其中之一。自歐聯分組賽展開後，佢哋嘅成績大插水，不但喺歐戰搏到盡照畀拿玻里、阿仙奴及多蒙特恰死，返到聯賽連雷恩、蘭斯、尼斯之流都打唔贏，一度陷入七場不勝困局，直至上仗靠球12碼先險勝包尾嘅索察，贏得冇乜說服力。阿些斯奧今季委任前祖雲達斯射手「銀狐」拉雲拿利揸旗，但「白頭佬」教波經驗唔夠，搞到淪為尾二，最終喺月初被炒，由青年軍教頭巴拉干尼頂上，球員精神面貌明顯好咗，上仗作客硬嘢嘅圖盧茲都能全身而退，睇得出佢哋為護級搏甩髀嘅決心，今晚喺主場對住馬賽，可趁對方有歐聯後顧偷到雞，仲有得受讓咁筍，梗係揀讓球主勝喇。
華拉奧沙勢鬥「大」

荷乙方面，阿梅爾城攻不銳守不穩，依家跌到落尾三，今晚作客撞正連贏四場、氣勢如虹嘅燕豪芬青年隊，都係凶多吉少。最後西甲華拉度列主場對奧沙辛拿，奧沙深陷降班漩渦唔搏唔得，定必豁出去進攻搶分，不過華拉度列亦非善男信女，前鋒查維亞古艾拿腳風又順，呢場似係鬥攻格局，捧入球大冇衰。