澳職榜首戰「西流」秤先

猪拉多纳

澳職到依家踢咗六輪，稍為對辦嘅都係布里斯班獅吼同西悉尼流浪者呢兩隊，其他球隊睇嚟都仲未上軌道，今日場獅吼主場對「西流」，正正係聯賽一、二哥對撼。

兩隊背景好唔同，上屆先加入嘅「西流」以後起之秀身份，一嚟就已經攞走個常規賽冠軍，真係奇蹟，佢哋之後雖然喺總決賽輸咗畀中岸水手，都已經係非戰之罪囉。呢隊波嘅神奇戰鬥力並唔係只得一時，今屆似乎無跌到watt，上季穩打穩紮作風一再延續，場場以控制比賽形勢行先，小勝就收貨！

「西流」收放自如，除咗係因為後防穩健之外，中、前場默契好，個個都有入球能力都係重點。開季到依家場場入波嘅球員都唔同，試問對手「嘜」得住邊個？馬克布歷治就更加係獅吼剋星，加上皇牌射手靴斯應該可以復出，「西流」嘅攻力就更有保証喇！
獅吼水準唔夠穩定

獅吼雖然上季走樣，但以依家走勢嚟睇，應該恢復番強隊本色，作客贏水手嗰場就更係代表作，相對於「西流」嘅穩定，「獅吼」就要及早改善佢哋喺呢方面嘅問題喇。之前球隊作客分別輸過畀墨爾本勝利同紐卡素噴射機，相信都係投X者嘅「驚世噩夢」！

今季要布萊治單打獨鬥其實都好吃力，就睇吓貝利沙今日復出幫到幾多啦。另外兩個主力麥特麥基同法蘭積都係啱啱踢完國際賽後歸隊，體能未必十足十，上季獅吼曾經四次輸畀「西流」，所以今日雖然有主場，但係都未必佔到上風。

（有線64台周五下午5時直播）
妹頭推介：西悉尼流浪者 下盤