史特加讓波「遜」唔過

猪拉多纳

主場冇料到後防鬆散

踢埋啱啱嘅國際賽檔期，32支可以亮相出年世界盃嘅國家隊終於塵埃落定，各大球迷嘅注意力係時候落番喺歐洲主流聯賽身上。今晚德甲有場獨腳戲，由主場惡唔出樣嘅史特加迎戰排第4嘅慕遜加柏，前者對住回勇兼有唔少傷兵歸隊嘅慕遜竟然要讓波，唔使諗咁多，一於撐1.62倍「讓客」。

（有線61及201周六凌晨3:30直播）

睇番往績，史特加近6次主場對賽贏足5場，可惜佢哋近況麻麻，上場砌低喺護級區域掙扎嘅弗賴堡，先叫做終止4場不勝。儘管史特加鋒力唔弱，但衰在防守甩漏多，近5戰雖然全部先開紀錄，但最後竟然有4場失分收場，可想而知條防線幾咁牙煙，最慘係守將波卡又未好番，叫人點信得過。再者，史特加主場成績極曳，開季至今只贏得1場咁大把，今日仲敢學人讓波，相信大家應該識點揀！
慕遜加柏近7戰僅1敗

另邊廂嘅嘅慕遜加柏就愈戰愈勇，近7場聯賽僅得1敗，就算對住多蒙特都可以淨勝兩粒，表現絕對唔失禮。依家成班波信心十足，力爭4連勝兼向下屆歐聯目標進發，賽前仲傳出好消息，後衞保華斯、洛特維迪傷愈復操，就連隊長達姆斯亦話有望上陣，教練法夫爾亦鼓勵球員要用表現保住正選位置，試問落場球員點敢唔搏盡？至於盛傳獲巴塞垂青嘅門將達史特根，會方亦放風要同佢傾續約，為咗「錢」途，今仗肯定會打醒十二分精神。配合最近輪住發炮嘅射手麥斯古斯、中場靴爾文、艾蘭高等人，絕對有力幫球隊搶分而回。
Data King 史特加場場有入波

‧近6次交手4度開出「半場大」。

‧史特加連續13場有波入。

‧慕遜加柏近7戰僅1敗。
乜都玩錦囊 雙方火力夠吼實半場大

史特加呢隊波好鍾意打閃電戰，經常喺上半場有進帳，偏偏防守又唔多掂，所以已經連續5場開出「半場大」。至於慕遜加柏嘅火力亦唔講得笑，佢哋聯賽入球數字比拜仁慕尼黑同利華古遜仲要多，憑佢哋近3戰入9球嘅攻力，兩軍各自喺半場入番粒唔出奇，2.35倍「半場大」抵玩。