和波王華拉度列讓唔起奧沙

猪拉多纳

西甲周五獨腳戲有場下游大戰，由華拉度列喺主場火併奧沙辛拿。咪以為主隊排第15位，高過奧沙辛拿4位就可以秤先，皆因佢哋只係和波專家先攞多2分，開季13戰贏得嗰2場咁大把！更重要係奧沙辛拿原來已經連續12次造訪華拉度列未輸過，信得過佢哋格食格恰死主隊，依家華拉度列讓波，力奇捧1.88倍「讓客」！

（開賽時間：周六凌晨4:00）
奧沙辛拿近12次對賽不敗

華拉度列今季13戰得2勝6和5負，和6場之多係西甲No.1。話佢哋屎又唔係，但又衰在冇乜本錢贏波，再加上佢哋個安哥拉前鋒文路祖都只係啱啱傷愈，中場奧斯卡干沙里斯與域陀佩雷斯又係有傷狀態未得，陣容不整，想贏波就難上加難啦！

奧沙辛拿依家排尾2，表現的確令人失望，但如果認定佢哋冇能力搶分，力奇認為未必！先講對賽往績，奧沙辛拿原來近12次作客華拉度列取得8勝4和，而且佢哋今仗有首席前鋒連奴養傷，但後防重心洛迪斯就波監刑滿復出，肯定唔敢搶攻，先求穩守，力奇只係博佢哋唔輸啫，唔大貪吖！