愛華頓受讓舔晒利

猪拉多纳

默西賽德郡打吡紅軍傷疲交併

英超早場嘅默西賽德郡打吡大戰，愛華頓主場激鬥利物浦，今季呢兩隊同市球隊皆為球迷帶來驚喜，以往海鮮味濃嘅利物浦開季竟然取得連場勝仗，依家排喺聯賽第2位，而「拖肥糖」亦唔輸蝕，踢咗11場聯賽僅嘗1敗，仲試過擊敗車路士，絕對唔嘢小，今仗更受惠對手飽受傷兵問題及FIFA病毒困擾，主場受讓值得秤先，讓球主勝值捧。

（now 621及630及100周六晚8時45分直播）
表現更勝莫耶斯時代

愛華頓今季冇受莫耶斯同費蘭尼過檔曼聯影響，改由馬天尼斯執教後成績不跌反升，全因馬帥除繼續行實而不華路線之外，亦改變咗球隊嘅踢法。「拖肥糖」一向能以蔗渣嘅價錢踢出燒鵝嘅味道，球隊班費唔高，今季只買入占士麥卡菲，但就借得盧卡古、巴利等幫到手嘅良將，再重用新星巴克里，實力即時大升呢。

另外，馬天尼斯更為球隊注入好多進攻同用波概念，即刻令「拖肥糖」好睇又好食，依家排名仲高過買咗好多球星嘅熱刺同曼城，錢唔係大晒又一鐵證。另外，葛迪遜公園球場堪稱地獄主場，愛華頓本年迄今一場主場聯賽都未輸過，紅軍今仗要喺呢度贏波絕對有難度。
踢完太公波狀態成疑

利物浦今季踢咗11場聯賽竟然贏咗7場，實情係因為開季賽程比較易踢，除主勝曼聯外，所贏嘅都係實力較弱嘅對手，但一對住好似史雲斯、修咸頓呢啲較硬淨嘅球隊，紅軍即刻現形，戰果非和即輸，今仗對手愛華頓比呢幾隊更難踢，再加上紅軍一眾主力喺周中踢完國際賽，隊長謝拉特、史杜列治更係帶傷替英格蘭上陣，而蘇亞雷斯更要老細搵私人飛機接佢返嚟踢呢場打吡大戰，可見班球員唔係傷就係攰，尤其前線「SAS」狀態成疑將大大影響紅軍爭勝本錢，作客養精蓄銳嘅愛華頓可謂全無優勢可言，加上盛名所累仲要讓波，計落非常唔合理，因此愛華頓讓球主勝更值得捧場。