寸王省招牌車仔扑錘

猪拉多纳

英超倫敦市大佬車路士開季客場戰績激曳，教頭莫連奴直言賽程難踢，今次作客同市弱雞細佬韋斯咸，若再失分莫帥再冇藉口遮醜，大軍有埋射手費蘭度托利斯復出，中前場齊腳，預期可以贏番場，熱捧客勝！

車路士開季聯賽作客五戰僅得五分，寸王莫連奴都知客場失血過多，但同時強調賽程編排確實難踢，車仔造訪曼聯同熱刺和波，作客愛華頓同紐卡素輸埋，賽程的確難搞，球隊唯一一場鬥較弱對手諾域治力戰贏3比1，反映班波始終有級數，今場遇上韋斯咸相信會較易踢。車仔射手費蘭度托利斯已復操，另一箭頭伊度奧開始上力，前線人手充裕。左閘艾殊利高爾雖然要養傷，但係艾斯派古達串演左閘效果都唔錯，唔使太擔心。
韋斯咸打反擊露晒餡

至於韋斯咸續有中鋒安祖卡路爾養傷，今季進攻重任落於曼聯青訓產品拉夫摩利臣身上，呢個小將確實極具天分，反擊時威脅好大，但依家阿茂都知呢位「巴打」好波，莫連奴一定會安排專人睇實佢。「錘仔幫」今季代表作係客場打反擊3比0炒熱刺，但呢招已經全面曝光，大軍早前主場對勁旅曼城輸1比3，今次對住另一勁旅車路士都係難打，相信會再輸多場。　
now 621直播