三箭想爭標問過櫻花先

猪拉多纳

日職剩餘最後三輪賽事，頭四位球隊只有三分差距，第五位嘅大阪櫻花直接影響爭標大局，皆因佢哋最後三場會面對第二至四位球隊，今輪率先喺主場硬撼三哥廣島三箭，大軍擁有當弗日本國腳柿谷曜一朗，唔怕三箭來襲，平手盤捧櫻花！

大阪櫻花落後榜首橫濱水手六分，爭標機會唔大，但佢哋餘下三仗要鬥廣島三箭、鹿島鹿角同浦和紅鑽，即係現時排二至四位嘅球隊，操控各隊爭冠前途。櫻花今季主場極硬淨，面對紅鑽及水手錄得一勝一和，等閒之輩好難作客砌低佢哋。櫻花王牌前鋒柿谷曜一朗近日成為國家隊紅人，剛於熱身賽對比利時取得士哥，出國搵食只係時間問題。反觀三箭主力射手佐藤壽人冇乜貨交，硬碰硬，櫻花佔上風，平手盤可秤先。
水手踢到殘捱「細」界

一哥橫濱水手今輪作客已經降班嘅磐田山葉，表面上睇落唔難踢，但無數經驗話畀我哋知，呢類榜首鬥榜尾賽事往往都會出現驚人賽果，特別係山葉依家無牽無掛，隨時有神來之筆。

再者，水手中場重心中村俊輔膽囊炎好番冇耐，隊內老將馬昆奴斯及杜特拉等搏足成季謝謝哋，大軍近五次作客只贏過包尾大幡大分三神1比0，其餘四戰不勝兼冇士哥，呢場博細盤好過。
有線61及201台直播：大阪櫻花 vs 廣島三箭

有線62及202台直播：磐田山葉 vs 橫濱水手