默郡打吡拖肥無懼紅軍

猪拉多纳

主場硬淨 盧卡古Fit爆

經過緊張刺激嘅國際賽生死戰，英超今晚重燃戰火，即刻有場默西賽特郡打吡上演，愛華頓喺麥迪遜公園火拼同市死敵利物浦，刺激程度未必差過C朗大戰伊巴謙o架！「拖肥」今季主場出擊未嘗一敗，對住人腳不整嘅利物浦，絕對有能力立於不敗之地。愛華頓受讓一球，1.56倍「讓球主勝」絕對係今場投X首選。

（now100、621及630台周六晚8:45直播）

愛華頓今季改由馬天尼斯領軍，經過開季3連和後，擊敗車路士後立即重返正軌，特別係主場出擊零舍醒神，5戰3勝2和未輸過。「新魔獸」盧卡古、米拿拉斯同新星巴克里威力十足，相信會帶畀利物浦一定威脅，而且中場有老大哥巴利坐鎮，防守力大大提升，強如熱刺同車路士都唔可以喺佢哋身上入波，唔好忘記仲有個罰球專家巴尼斯，佢都有改寫戰局嘅能力。

利物浦今季無歐洲賽踢，可以集中火力主攻聯賽，事實上，「紅軍」今季人腳係近年最好，「哨牙蘇」蘇亞雷斯同史杜列治火力強勁，可惜佢哋「遇強愈弱」，今季3場硬仗包括對阿仙奴同兩鬥曼聯，加埋只係入咗一球咁大把，打吡戰入唔到波都唔出奇。
蘇亞雷斯遇強隨時啞火

更慘情係利物浦依家唔少傷兵，史杜列治踢完國際賽後帶傷回歸，今場上陣成疑，左閘荷西安歷基啱啱做完手術又要抖到出年1月，雖然法國出線世界盃英雄馬馬度沙高賽前剪咗個靚頭嚟迎接打吡，但佢今季喺英超演出都只係一般咋。